Information

       prësc messëis Os scolars tó na dezijiun dër importanta por Osc dagnì. I messëis chirì fora chëra scora che i orëis frecuentè do avëi stlüt jö la scora mesana. Por Ves dè n pic' aiüt a tó la dërta dezijiun, oressun Ves dè en cört valgönes informaziuns sura l'

ISTITUT TECNICH COMERZIAL

(ITC)

La Ila / Badia

INFORMAZIUNS GENERALES

        Cun l'ann de scora 1994/95 à l'Istitut tecnich comerzial (ITC) sostituì l'Istitut profescional por le comerz (IPC).

        L'ordinamënt de chësta scora nöia, impostada sön i bojëgns de nüsc tëmps, de nosta situaziun culturala, economica y soziala è IGEA :

Indirizzo Giuridico Economico Aziendale.

La scora döra 5 agn y se röia cun l'Ejam contlusif de Stat.

Le profil dl diplomè dl ITC é chël de avëi conoscënzes, capazitês y competënzes orientà dandadöt ala gestiun, organisaziun y aministraziun de n'aziënda. Chësc ó dì danter ater:

- avëi na basa culturala ampla cun de bones capazitês linguistiches-espressives y logiches-interpretatives;

- avëi conoscënzes sön i prozèsc de gestiun aziendala sot l'aspet iuridich, economich y aministratif;

- savëi da adorè tecnologies informatiches por organisé sistematicamënter le laûr;

- avëi n'identité personala por savëi da afrontè i problems da vigni dé y les mudaziuns.

I pröms 2 agn de scora é caraterisà da n insegnamënt de cultura plütosc generala, i ultims 3 da n insegnamënt comerzial-aministratif plü spezifich.

CUADER ORAR

        A pert l'ora de ladin y l'insegnamënt paritetich por talian y por todësch, é cuader orar y programs i medemi de chi dles "Handelsoberschulen" todësces da Bornech, Porsenù, Sterzing, Balsan, Auer, Maran, Schlanders y Mals.

STROTÖRES

        Por Ves garantì na dërta preparaziun, ciafarëise na scora arjignada ite bun cun chisc locai speziai:

- na biblioteca;
- n local da computer;
- n local por l'insegnamënt dla fisica y chimica, sciënza dla tera y biologia;
- n local por "media" (TV, video, DVD, stereo);
- n local multimedial y por laurs de grup;
- na simulimpresa / "Übungsfirma".

La simulimpresa é n labor por ti dè ai studënc' la poscibilité da fà pratica aziendala y comerziala:

        te 4^ tlassa laora i studënc' por 3 ores al'edema tles desvalies repartiziuns (secretariat/gestiun dl personal, de aministraziun, de acuisiziun, de venüda/marketing) y manajëia, sot l'aspet dla simulaziun, na aziënda/firma reala do les regoles dl marcé y fej a chësta moda esperiënzes pratiches de laûr.

Tla simulimpresa vëgnel dandadöt imparè y formè chëstes conoscënzes, capazitês y competënzes:

- adorè tecnologies nöies de ofize, informaziun y comunicaziun (Tel., Fax, E-mail, Internet);
- desmostrè autonomia y creativité te situaziuns economiches y aministratives;
- laurè te n team, savëi da cooperé y da comuniché;
- odëi y afrontè problems, surantó responsabilité, laurè fora n conzet, organisé le laûr, chirì soluziuns, svilupé strategies nöies, documentè le laûr;
- mioré les conoscënzes de talian, todësch y inglesc tl setur aministratif y economich tres le contat y i raporc' cun les atres simulimpreses te Südtirol y foradecà.

La "simulimpresa"

Local da computer

cun :

- Internet
- tröc programs
- rëi pedagogica
- scanner
- videoproiector

POSCIBILITES DO L'EJAM CONTLUSIF DE STAT

       Do avëi stlüt jö l'ITC, arëise n diplom por:

- podëi studié inant te vigni faculté de vigni université. Dandadüt arëise na bona preparaziun por studié inant tl ciamp   dl'economia, dl comerz, dla iurisprudënza, dla politica, dl turism, dl'informatica, dl management, di lingac etc.

- podëi frecuentè de vigni sort de cursc post-matura o alternatifs al stüde tl'université;

- podëi lascè da studié y Ves inserì tl monn dl laûr. Te chësc caje arëise la dërta preparaziun por fà secretêr/ia o impiegat/ada te vigni ofize dl'aministraziun publica (posc' dla cariera "B") y privata sciöche p.ej. te comun, te scora, tl'aziënda de turism, te na banca, pro la posta, pro en comerzialist, te n hotel, te na firma, por manajè l'aziënda de familia etc.

L'orientamënt pratich dla scora garantësc na bona preparaziun por afrontè dedô vigni sort de mistier.

CONTLUJIUN

        Deach' l'ITC dà na bona formaziun y preparaziun por interpretè la realté, s'orientè y afrontè le monn d'al dedaincö y da indoman y lascia do l'Ejam contlusif de Stat dötes les portes davertes, é l'ITC dessigü por tröc la dërta scora.

        Por tröc saràl n pü' adora por podëi bele sëgn dì de fà do l'Ejam contlusif de Stat ciamò intan d'agn d'université. L'ITC dà la poscibilité de sburlé fora chësta dezijiun y d'la tó definitivamënter do avëi stlüt jö la scora alta. Sce i n'ëis ilò nia plü vëia de studié inant, ëise na bona cualifica y n diplom tles mans por podëi jì a laurè y davagné val'. Ince por chësta rajun sarëise plü tert contënc' d'avëi chirì fora l'ITC.

       Tl ITC da La Ila sarëise bëgnodüs. La scora fajarà le poscibl por formè Osta personalité y Ves garantì na bona preparaziun culturala y profescionala.

D'atres informaziuns ciafëise pro le secretariat dl ITC a La Ila:

numer de tel. 0471/847 252.

Cun respet y a s'odëi            

L'ITC

La Ila, novëmber 2002